Төрткүл дүние көз тіккен Тұманды Альбион еліндегі ХХХ жазғы ойындар бел ортасынан ауып бара жатыр. Әзірше, Қазақ елінің намысын қорғауға атанған спортшыларымыздың нағыз сенім артқан саңлақтары толығымен жарыс жолына шыға қойған жоқ.

Десек те, алғашқы күнде-ақ қоржынымызға Олимпиада «алтыны» түсті. 28 шілде күні велоспорттан тас жолдағы ерлер арасындағы жарыста Александр Винокуров алдына жан салмай мәре сызығын бірінші болып кесті. Айта кетерлігі, мәреге сегіз шақырымнан аз қашықтық қалғанда көшбасшы топта екінші келе жатқан А.Винокуровтың алдындағы шабандоз шұғыл бұрылыста рөлге ие бола алмай құлаған болатын. Міне осы кезде өкшелеп келе жатқан біздің спортшы да оған соқтығыспау үшін жылдамдықты азайтып, көш бастап келе жатқан топтан көп кейін қалуға мәжбүр болды. Дегенмен, бар күшін жұмсаған А.Винокуров мәреге бес шақырым қалғанда топты қуып жетіп қана қоймай, суырылып алға шықты. Осылайша, 250 шақырымдық жарыс жолының соңғы сәттерінде алдына жан салмаған ол, Лондон Олимпиадасында Қазақстан ұлттық құрамасының қоржынына алғашқы «алтынды» салды.

Халықаралық ауыр атлетика федерациясы жария еткен әлемдік рейтингте 53 келі салмақ санатында көш бастап тұрған зілтеміршіміз Зүлфия Чиншанлоға Лондон Олимпидасында зор сенім артқан болатынбыз. Ол сол сенім үддесінен шықты. Зүлфия жарыстың алғашқы жаттығуы жұлқа көтеру сайысында 95 келіні бағындырып, үшінші орынға тұрақтаған болатын. Дегенмен, серпе көтеру сайысының екінші тапсырысында 131 келі көтеріп, әлем рекордын жаңартумен қатар, Олимпиада чемпионы атағын жеңіп алды. Ол екі сайыстың қорытындысы бойынша 226 келіні бағындырды.